Prentsa eta argitalpenak | Prentsa-oharrak

Prentsa-oharrak

ABENDU HONETAN, MERCABILBAOK 20.000 TONA BAINO GEHIAGO MERKATURATZEA AURREIKUSTEN DU

Gabonen etorrerak erritmo frenetikoa dakar Mercabilbaora urteko azken asteetan, handizkariek salerosketaren gorakada bizi baitute, kalitatezko produktuak, osasungarriak eta prezio onekoak eskaintzeko helburu nagusiarekin. Izan ere, Elikagai Unitatearen kalkuluen arabera, 20.000 tonatik gora merkaturatuko dira abenduan zehar, hau da, urteko merkaturatzearen %10 inguru, aurreko urteetako datuak kontuan hartuta.

Mugimendu gehieneko egunetako batean, Iberiar Penintsulako iparraldeko elikagai galkorren banaketa zentro nagusiak, Xabier Ochandiano Bilboko Udaleko Garapen, Merkataritza eta Enplegu zinegotziaren eta Aitor Argote Mercabilbaoko zuzendari nagusiaren bisita jaso du. Zuzenean ezagutu ahal izan dute handizkako eta txikizkako merkataritza enpresek eguneko lehen orduetan produktuak saltokietara fresko iristeko egiten duten lana.

Sektoreka, arrainen eta itsaskien sektoreak abenduan 3.000 tona inguru merkaturatzea aurreikusten du, hau da, urteko merkaturatze osoaren %10. Eskari handiena duen produktua, aurten ere, legatza izaten ari da, eta ondoren txipiroi izoztua, izokina, otarrainxka izoztua eta lupia datoz.

Fruten eta ortuarien merkatuaren kasuan, 2019ko abendu honetarako aurreikusten diren kopuruak 18.000 tona baino zerbait gehiagokoak dira, hau da, urte osoko salmenten %8.

Aitor Argoteren berbetan, “arrain eta itsaski handizkariek urteko fakturazio osoaren %16 inguru egiten dute hilabete honetan, gero eta gehiago Gabonak hurbildu ahala”. Datu horrek itsas pabiloia jartzen du goizeko jarduera intentsitate handiagoaren erreferente gisa.

Merkaturatze osoa azaroaren 30ean

2019ko azaroaren 30eko merkaturatze datuak 230.866 tonakoak dira, 2018ko garai berean baino pixka bat gehiago, fruta eta barazki sektoreko salmentetan 1.431 tona gehiago saldu baitira, 209.066 tonara iritsiz. Aldiz, arrainen eta itsaskien sektorean merkaturatzeak behera egin du, eta 21.800 tonatan dago.

Sektoreen araberako epealdi indartsuei dagokienez, aipatzekoa da arrainetan eta itsaskietan, martxoa, maiatza eta ekaina izan direla orain arte salmenta gehieneko hilabeteak, abenduko datuen faltan. Esan behar da, oro har, abenduko datuak urteko gainerako hilabeteetakoak baino handiagoak izaten direla. Ildo beretik, fruta eta barazkietan apirila, maiatza eta ekaina nabarmentzen dira, merkaturatze handieneko hilabeteen artean.

Jarduera hori guztia ez litzateke posible izango Mercabilbaon lan egiten duten pertsonen, operadoreen, jarduera osagarrien guneko, merkataritza guneko eta bulegoetako langileen, lanik gabe. Azpiegitura horrek 939.533 ibilgailu hartu ditu aurten azaroaren 30era arte, batez beste 3.000 sarrera egunean, eta datozen Gabonetan areagotu egingo da, arrainen eta itsaskien sektorean, batez ere.

Mercabilbaok 13 hektarea inguruko azalera du, eta bertan mila langile baino gehiago dituzten ehun enpresatik gora ari dira lanean. Hori guztia, Mercabilbaoko instalazioetan lanean ari diren enpresek biltzen duten jardueraren eta esperientzia handiaren isla da.

Are gehiago, arrainen pabiloiak, produktuen kalitatea bermatzen duten azterketak egunero egiten dituen osasun ikuskapeneko laborategia du.

Laburbilduz, gaur egun, euren produktuak instalazio hauetan hartzen dituzten jatetxeek, ostalaritzako eta merkataritzako establezimenduek, ondo baino hobeto ezagutzen dute Mercabilbaoren kalitatearen, elikagai segurtasunaren eta betiko zapore onenaren sekretua. Iberiar Penintsularen iparraldeko janaritegi handiena da.

Alexa aplikazioaren aurkezpena

Elikagaien salerosketa pabiloiak bisitatu ostean, Xabier Ochandiano eta Aitor Argotek, Gurutze Beitia eta Karmele Larrinaga antzezleek lagunduta, Alexa aplikazioa aurkeztu dute, Mercabilbaori buruzko informazio orokorra ematen duen Amazonen bozgorailu adimenduna. Gainera, galdera jolas baten bitartez, app-aren erabiltzaileek Elikagai Unitateko zenbait alderdi sakon ezagutzeko aukera izango dute.

Prentsa oharra deskargatu

MERCABILBAOK EUSKALITEK EMATEN DUEN KUDEAKETA AURRERATUARI ZILARREZKO A LORTU DU

Mercabilbaok Zilarrezko A Kudeaketa Aurreratuari Euskal Saria jaso du, Eusko Jaurlaritzak sustatzen duen Kalitaterako Euskal Fundazioak, EUSKALIT, ematen duena. Aintzatespen honekin praktika aurreratuak dituzten eta  bere interes taldeen -bezeroak, pertsonak, akziodunak eta gizartea besteak beste- asebetetze orekatua bilatzen dituzten erakundeak saritzen dira. Aintzatespena hurrengo abenduaren 18an banatuko da, Gasteizeko Europa Jauregian 18:30etan.

Elikagaien Unitateak bere kudeaketa sistema ebaluatzeko eta hobetzeko Kudeaketa Aurreratuaren Eredua erabiltzen du erreferente gisa, eta saria lortu du, EUSKALITeko Ebaluazio Klubeko ebaluazioa jaso ostean.

Mercabilbao Euskal Autonomia Erkidegoko Elikagaien Unitate publikoa da, eta elikagaigintzaren sektoreari kalitateko produktu fresko nahiz eratorrien merkaturatze- eta logistika-zerbitzu osoa eskaintzen diogu. Elikagaien segurtasuna eta merkatuen lehia bermatzen duten azpiegituren bitartez lortzen dugu hori, betiere, kontsumitzailearen mesedetan.

Kudeaketa Aurreratuari Euskal Saria

Kudeaketa Aurreratuaren Euskal Saria sortu da, EAEko erakundeen artean Kudeaketa Aurreratuaren garrantzia lehiakortasunaren funtsezko elementu gisa bultzatzeko eta zabaltzeko.

Kudeaketa-sistemaren etengabeko hobekuntza eta aurrerapenarekin konpromisoa erakusten duten Euskadiko enpresa, hezkuntza-zentro, osasun-zentroek eta bestelako erakundeek, publikoek zein pribatuek, erdiesten dituzte Eusko Jaurlaritzak EUSKALITen bitartez ematen dituen aintzatespen horiek.

Sari horien helburua kudeaketako erakunde aurreratuenak identifikatzea eta aintzat hartzea da, era horretan Euskadiko sare sozio-ekonomikoa Kudeaketa Aurreratua lehiakortasunaren funtsezko elementu gisa ezartzearen garrantziaz sentsibilizatzeko eta erakunde bakoitzaren emaitzak hobetzeko.

Aintzatespen hauek lortzeko erakundeak bere kudeaketa sistemaren garapen maila jakin bat duela erakutsi behar du. Horretarako, EUSKALITek Kudeaketa Aurreratuaren Eredua erreferentetzat hartzen duten Kanpo Kontraste eta Kanpo Ebaluazio zerbitzuak eskaintzen ditu.

Zerbitzu bietan, Kanpoko ebaluatzaile talde batek erakunde baten kudeaketaren azterketa orokorra eta sistematikoa egiten du, ikuspegi objektiboa erakutsiz, Kudeaketa Aurreratuaren Ereduaren arabera.

EUSKALITeko Ebaluazio Klubak modu altruistan elkarlanean aritzen diren 2.000 zuzendarik eta teknikarik baino gehiagok osatzen dute.

Prentsa oharra deskargatu

MERCABILBAOK TOKIKO MERKATARITZA BULTZATZEKO KANPAINA JARRI DU MARTXAN, KALITATEZKO PRODUKTUEN ERREFERENTE GISA

Mercabilbaok tokiko merkataritza sustatzeko kanpaina abiarazi du, elikagaien banaketa katean erreferentziazko eragile eta Bilboko eta haren eremu metropolitarreko sustatzaile ekonomiko eta sozial gisa. Xabier Ochandiano Bilboko Udaleko Ekonomiaren Garapen, Merkataritza eta Enplegu Saileko zinegotziak eta Aitor Argote Mercabilbaoko zuzendari nagusiak prentsaurrekoan aurkeztu dituzte gaur goizean xehetasun guztiak, Gurutze Beitia, Karmele Larrinaga eta Lander Otaola antzezleekin batera. Xabier Aburruzaga trikitilariak jarri dio soinu banda aurkezpenari.

“Jaten duguna garelako. Gertu erosita urrutira helduko gara”. Premisa horren pean, Mercabilbaok, egunero kalitatezko produktuak, zaporetsuak eta osasungarriak eskaintzen dituen eta Elikagai Unitatean jarduten duten handizkako enpresa guztien berme zigilua duen gertuko merkataritza arduratsuaren garrantzia nabarmendu gura du. Hiru helburu argi azpimarratzen ditu: merkataritzaren arloan belaunaldien arteko erreleboa bultzatzea, elikadura osasungarria sustatzea eta elikagaien banaketaren merkatuan egiten den jarduera ekonomikoari balioa ematea.

Horrela, eta bere plan estrategikoarekin bat eginez, kanpainaren bidez, enpleguarekin, kontsumo arduratsuarekin, ingurumenarekin eta elikagaiak alferrik galtzea saihestearekin duen gizarte erantzukizuna indartzen du. Etorkizuneko Mercabilbaori, hiribilduaren eta bere ingurunearen eraldaketa ekonomikoa eta soziala sustatzeko gai den zerbitzu enpresa publikoari, begirada.

KANPAINA HUNKIGARRIA ETA GERTUKOA

Gurutze Beitia, Karmele Larrinaga eta Lander Otaola antzezleak, zinean, antzerkian eta telebistan ikus-entzuleentzat ezagunak diren aurpegiak, osagai hunkigarria duten eta eguneroko bizitzako hiru errealitate ezagutzera ematen dituzten hiru istorioren protagonistak dira. Kontakizun bakoitzean, elikagaien banaketa katea osatzen duten eragile guztiak agertuko dira: handizkako enpresak eta merkatuko langileak, enpresa txikizkariak eta azken kontsumitzaileak. Horrez gain, Xabier Aburruzaga trikitilaria da gaur egungo doinu baten bitartez istorioei soinu banda jartzearen arduraduna.

HIRU ISTORIO, MERCABILBAORI ETA HURBILEKO MERKATARITZARI BURUZKO HIRU ERREALITATE

Erreleboa. “Hiriak lo diharduen bitartean, badira gure egunerokotasuna hobetzen laguntzen duten istorioak”

Eguneroko jardunean narratiba pertsonala eta naturala eginez, hurbileko merkataritzaren etorkizuna bermatuko duen belaunaldien arteko erreleboa bultzatzeko beharra azpimarratzen du, Bilboko eta inguruko ekonomia, enplegu eta gizarte eragile gisa.

Bideoa ikusi

Ezin dut burutik kendu. “Onena aukeratzen dugun bakoitzean, bizitzak bere irribarre onena oparitzen digu”

Protagonistaren bereizgarri den umore ukituarekin, Mercabilbaoren “Labela” duten eta “betiko fruta saltzaileak” saltzen dituen produktuen freskotasuna, zaporea eta kalitatea nabarmentzen ditu. Azken kontsumitzailearekiko konplizitatez beteta dagoen eta egunerokotasunaren garrantzia islatzen duen istorioa.

Bideoa ikusi

Edozein egunetan. “Egunerokotasunaren atzean, pertsona gehienentzat nekez ikus daitekeen sekretuz betetako mundu bat aurkitzea posible da”

Kanpainaren hiru aurpegiek modu atsegin eta dibertigarrian hausnartzen dute Mercabilbaori eta haren instalazioetan egunez egun eta atsedenik gabe egiten den lanari buruz. Handizkako enpresak, elikagaien segurtasuna, garbiketa, hondakinen kudeaketa, bezeroak… Mercabilbao osatzen duten eragile guztiak erakusten dira.

Bideoa ikusi

Prentsa oharra deskargatu

MERCABILBAOK ETA BILBOKO PORTUAK FRUIT ATTRACTION AZOKARA BIDAIATUKO DUTE, NAZIOARTEKOTZE ESTRATEGIA FINKATZEKO HELBURUZ

Bilboko Portuko Agintaritzak eta Mercabilbaok berriro hartuko dute parte batera Fruit Attraction Azokan, nazioarteko fruta eta ortuari ekoizpenaren ordezkaritza zabalena jasotzen duen nekazaritza sektoreko ekitaldi nagusian. Urriaren 22tik 24ra egingo da IFEMAn (Madril). Lankidetza horren bitartez nazioartekotze estrategia balioan jarri gura da, Penintsula iparraldeko nekazaritzako produktuak eta fruta inportatzen eta esportatzen dituen Elikadura Hub gisa.

Bi erakundeek urteak daramatzate lankidetza estuan, beste batzuen artean Hego Afrikatik, Hego Amerikatik eta Amerika Erdialdetik merkantzia sartzeko fluxuak handitzeko aukera ematen dien estrategiaren bidez. Horrez gain, frutak eta ortuariak Europara eta Penintsulako gainerako lekuetara berbidaltzeko gaitasuna ere ematen du. Horrela, Mercabilbaok eta Bilboko Portuak dauden sinergiak baliatzen dituzte, kargatzaile berriak erakartzeko.

2018an, fruten eta ortuarien Bilboko Portuko trafikoa 157.000 tonakoa izan zen, aurreko ekitaldian baino %16 gehiago; eta urte honetako urtarriletik abuztura, hazkundea %23koa da jadanik. Bilboko portuak eta bere operadoreek fruten eta ortuarien sektoreari ematen dizkioten abantaila nagusiak hauek dira:

  • 24 orduko Muga Ikuskaritza puntua, gaitasun hauek dituena: PIF, Deskarga portua, PED, PED/PDI, Radioaktibitatea, RAH eta  PPI
  • Edukiontzi eta roro terminalak.
  • Reefer konexioak edukiontzien terminalean.
  • Tenperatura kontrolatua duten biltegiak, produktu hoztuentzat eta izoztuentzat.
  • Operatiba arina.
  • Operazioen koordinazioa, merkataritza elektronikorako e-puertobilbao gure plataformaren bitartez, ahalik eta arintasun handiena izateko.
  • Mercabilbao, penintsula iparraldeko elikadura hub-a, Portutik 20 kilometrora
  • “Brexit proof port”

Mercabilbao

2018an, Mercabilbaoren komertzializazioa 253.900 tonatik gorakoa izan zen, eta horietatik 225.258 tona frutak, barazkiak eta ortuariak izan ziren, kopuru historikoa.

Mercabilbaok duen kokagune estrategikoa dela eta, Paris-Hendaia-Madril ardatzak bat egiten duen puntutik oso gertu, Kantaurialdeko autobiaren ondoan, eta lotura zuzenarekin autobide sarearekin, Bilboko Portuarekin batera leku ezin hobean dago nazioartekotze estrategia eraginkorra eta kalitatezkoa aurrera eraman ahal izateko. Abantaila lehiakorra da ortuarien eta fruten sektoreko operadoreentzat, baliabideen, ekonomiaren, denboraren, dauden azpiegituren edo biltegi logistikoen ikuspegietatik.

Prentsa oharra deskargatu

MERCABILBAO GERO ETA KUDEAKETA EREDU JASANGARRIAGORANTZ DOA AURRERA, 2018AN 253.900 TONA KOMERTZIALIZATUZ

Kudeaketan gardentasuna eta etika izatean, ingurumenaren aurreko errespetuan eta kontsumo arduratsuaren sustapenean oinarrituta, Mercabilbaok etorkizunari begira hasi du 2018-2021 ziklo estrategikoa, gorantz doazen jarduera emaitzekin. Horrela, 2018. urtearen amaieran, komertzializazio bolumena 253.951 tonakoa da, aurreko ekitaldian baino %2 gehiago.

Sektoreka, fruten eta ortuarien salmentak gorantz jarraitzen du, 225.258 tonako komertzializazio bolumena lortuz, hau da, aurreko ekitaldian baino %2,66 gehiago. Frutei dagokienez, azpimarragarriak izan dira platano, aguakate eta mango salmentak, %59,69ko, %34,81eko eta %32,77ko igoerarekin, hurrenez hurren, 2017arekin alderatuz. Ortuarien alorrean, kalabazaren, alberjiniaren eta tomatearen kontsumoak gora egin zuen, %5,89, %5,56 eta %4,8, hurrenez hurren. Iaz komertzializatutako fruta eta ortuari guztietatik, parte handiaren jatorria estatukoa izan zen (%87 inguru) eta gainerakoa inportatutakoa.

Arrainaren, itsaskiaren eta izoztutako itsasoko produktuen merkatuari dagokionez, 25.407 tona merkaturatu ziren, 2017an baino %5,77 gutxiago. Horrela, arrainak %6,52ko jaitsiera izan zuen, itsaskiak %1,05ekoa eta izoztutako produktuek %7,91. Biztanleen erosketa eta kontsumo ohituren aldaketak ere izan du eragina jaitsiera horretan. Azpimarratzekoa da Bizkaiko Golkoko portuak direla, oraindik ere, arrain fresko hornitzaile nagusiak, eta euren atzetik, Galizia. Itsaski gehiena, berriz, Galiziako portuetatik dator.

Fruten eta ortuarien, eta arrainen, itsaskien eta izoztutako itsasoko produktuen sektoreen prezioak antzekoak dira aurreko urteekin alderatuta.

Elikadura orokorreko produktuak, arrautzak, haragia, esnekiak eta elikagaiak orokorrean barne hartzen dituen sektore anitzari dagokionez, 3.285 tona komertzializatu zituen, aurreko urteetako joerarekin jarraitzen duen zifra, %0,5eko jaitsiera arinarekin.

Mercabilbao modu formalean eratu zenetik 50 urte baino gehiago eta errendimendu osoz ari denetik 47 urte igaro direnean, gaur egun merkatuak mila langile baino gehiago ditu, %100etik gertu dagoen okupazioa du eta ehun enpresa baino gehiago ari dira 13 hektareako azaleran. 2018ko abenduaren 31ko datarekin, Elikadura Unitateak 654.645 ibilgailu jaso zituen.

Merkatu jasangarriagorantz

Duela denbora gutxi martxan jarri den 2018-2021 Plan Estrategikoaren bitartez, Mercabilbaok ingurumenarekin, herritarren kontsumo arduratsuaren sustapenarekin, kudeaketa gardenarekin eta Penintsula iparraldeko elikagai galkorren despentsa handienaren garapen sozioekonomikoarekin gero eta merkatu eredu jasangarriagoan oinarrituta begiratzen dio etorkizunari.

Mercabilbaok herritarren kontsumo arduratsuan ardura duen eta hori bultzatu behar duen eragile gisa, aurrera jarraitzen du alperrik galtzen diren elikagaien bolumena murrizteko esfortzuekin. Horretarako, parte hartze aktiboa du elikagaien aurrezpenerako kontzientziazio kanpainetan, Bizkaiko Elikagaien Bankuarekin aritzen da, instalazioetan biltegi bat lagaz, soberan dauden elikagaiak modu arinagoan banatu ahal izan daitezen, gizarte jantokiei eta laguntza zentroei, besteak beste. 2018an Mercabilbaok 494 tona genero eman zituen, hau da, erakundeak jasotako guztiaren %21,23. Azpimarratu behar da, gainera, barrutian lan egiten duten 27 enpresa Elikagaien Bankuarekin lankidetzan aritu direla. Aldi berean, Elikadura Unitateak hondakinen bilketa selektiboak egiten ditu, animalien merkatura zuzenduta.

Ildo horretan, Mercabilbaok elikadura osasungarriaren garrantzia ikusgai bilakatzeko apustua egiten du, arrain, fruta eta ortuari zentzumen tailerren bitartez, ikasleei zuzenduta, eta baita profesionalek eta gizarteko beste kolektibo batzuek bertara egiten dituzten bisitei zuzenduta ere. 2018an 83 ikastetxeko 1.884 ikaslek hartu dute parte zentzumen tailer horietan. Gainera, Mercabilbao, Eusko Jaurlaritzako Osasun Sailarekin batera, bizitza osasungarriko ohituren gaineko ekimenean parte hartu du, Euskadin haurren obesitatea prebenitzeko estrategia bat sortzea ekarri duena. Ekimenen marko berean aopa beharra dago Mercabilbaok “5 al día Fundazioan” parte hartzen duela, egunero fruta eta barazki freskoak kontsumitzea sustatzeko.

3S izenekoekin “Zaporetsua, Segurua eta Osasungarria” agerian jarri den bezala, Mercabilbaok gizartearekin duen erantzukizunak elikagai barrutia gainditzen du. Kudeaketa, kontrol eta garapen politikak, merkatuak herritarren eguneroko bizitzan parte hartzera daude zuzenduta. 2018an gastronomiarekin, kirolarekin, eguneroko jarduketan euskararen finkapenarekin eta elkartasunarekin erlazionatutako ekitaldietan hartu zuen parte, besteak beste.

Birziklapenaren aldeko apustua

Duela 10 urte baino gehiagotik merkatuak garbiketa zerbitzuaren kudeaketa integralaren eta instalazioen higiene-osasun baldintza onenak bermatuko dituen hondakinen kudeaketaren aldeko apustua egiten du, bertako eguneroko jarduera behar bezala gauzatuko dela bermatzeko. Horregatik, Mercabilbaok estrategia eraginkorrak bultzatzen ditu hondakinen bilketa selektiboan, horrela birziklapen kuotak eta balorizazioa handitzeko.

Horrela, sortutako hondakinen gainean lortutako birziklapen ehuneko osoa %38,50ekoa izan zen 2018an, aurreko ekitaldian baino %2,47 gehiago. Igoera horren arrazoia, paper eta kartoi, egur, eta fruta eta barazki organiko gehiago bildu zela izan da. Horrez gain Mercabilbaok berriztatu egin zituen garbiketa zerbitzua eta hondakinen kudeaketa osatzen duten ibilgailuak. Ondorioz, bilketan teknika aurreratuenak dituen eta ingurumena errespetatzen duen flota modernoagoa dauka.

Kalitatezko kudeaketa aurreratuari eta gizarte balioaren aldeko apustu irmoari dagokionez, 2018an, EUSKALITek, Eusko Jaurlaritzak bultzatutako fundazioak, emandako kudeaketa aurreratuaren diploma lortu zuen. Diplomaren xedea Euskadiko kudeaketa jardunbide onenak aintzatestea da.

Memoria osoa hemen: www.mercabilbao.eus

Prentsa oharra deskargatu

FRUTA ETA BARAZKIENTZAT MERKATU BERRIEN BILA JOANGO DIRA BERLINERA BILBOKO PORTUA ETA MERCABILBAO

Bilboko Portuko Agintaritzak eta Mercabilbaok fruta eta barazkien trafiko berriak erakartzeko dituzten abantailak azpimarratu nahi dituzte Fruit Logisticen, sektoreko Europako azoka nagusian. Otsailaren 6tik 8ra egingo da Berlinen.

Bi erakundeak batez ere Hego Amerikako eta Erdialdeko Amerikako merkatuei zuzenduko zaizkie, eta erakutsiko diete zer abantaila dituzten azpiegituretan eta zerbitzuetan fruta eta barazkiak Europara eta penintsula osora eramateko, errepideko garraioaren ordezko aukera gisa.

Prentsa oharra deskargatu
1/812345...»

Nabarmendutako gaurkotasuna

Albistea

Bizkaiko 2.100 ikasle baino gehiagok parte hartuko dute 2019-2020 Zentzumen Tailerretan

Gehiago irakurri

Iragarki ofiziala

Ezhoizko Bazkide Orokorra

Gehiago irakurri

Prentsa oharra

ABENDU HONETAN, MERCABILBAOK 20.000 TONA BAINO GEHIAGO MERKATURATZEA AURREIKUSTEN DU

Gehiago irakurri

Urteko txostena

2018 urteko txostena

Deskargatu

Sartu bideoen atalera

Ikusi bideoak

Argitalpena

Lau urtaroak

Deskargatu

Esta web utiliza 'cookies' propias y de terceros para ofrecerle una mejor experiencia y servicio. Al navegar o utilizar nuestros servicios el usuario acepta el uso que hacemos de estas 'cookies'.

Informazio gehiago