Prentsa eta argitalpenak | Prentsa-oharrak

Prentsa-oharrak

MERCABILBAOK IKASTETXEEI ZUZENDUTAKO ELIKAGAIEN TAILER SENTSORIALAK HASI DITU BERRIRO

Mercabilbaok arrainari, frutari eta barazkiei buruzko Tailer Sentsorialei ekingo die aurten ere, COVID-19aren pandemia dela-eta urte eta erdiko geldialdiaren ostean. Gizarteari laguntzeko duen konpromiso politikaren barruko ekimenak berreskuratzeko asmoz, Elikagaien Unitateak Bizkaiko ikasleak bere instalazioak bisitatzera gonbidatu ditu berriro ere. Jarduera horri esker, bertatik bertara ezagutu dezakete zeintzuk diren elikagaien zikloak, itsasoan harrapatzen edo lurrean biltzen direnetik euren etxe eta mahaietara iristen diren arte.

Bisitak urrian hasi dira, 2022ko ekainaren 10era arte luzatuko dira eta asteartetik ostiralera egingo dira, 9:45etik aurrera, gutxi gorabehera bi ordu eta erdiko iraupenarekin. Prebentzio-arauak eta parte-hartzaileen segurtasuna direla eta, taldeek ezingo dira egunean 25 ikasle baino gehiagokoak izan. Ikastetxe gehiagok parte har dezaten, ikastetxe bakoitzeko kurtso bakarra onartuko da.

Gaur egun Tailer Sentsorial horietan parte hartzen duten umeak etorkizuneko kontsumitzaileak dira; horregatik, oso garrantzitsua da elikagai-establezimenduetan edo euren etxeetan ikusten dituzten arrainak, frutak eta barazkiak ezagutzen ikastea. Mercabilbaoren helburu nagusiak hauek dira: produktu fresko eta kalitatezkoekiko zaletasuna heztea; biodibertsitatearen eta ingurumenarekiko errespetuaren alde elikadura-kontzientziazio eta -heziketa handiagoa sustatzea; nekazariak eta arrantzaleak gizartean aintzatestea, eta ondare gastronomikoaren garrantzia helaraztea.

Horretarako, ikasleek instalazioetatik ibilaldi bat egingo dute begirale baten gidaritzapean, elikagai galkorren banaketari dagokionez egiten diren jarduerak ezagutzeko eta fruta eta barazkien jatorria, propietateak eta bitxikeriak ezagutzeko. Amaitzeko, tailer sentsoriala egingo da. Bertan, parte-hartzaileek sasoiko arrainekin kontaktua izango dute, arrain urdinak eta zuriak sailkatzen ikasiko dute eta dieta osasungarri batean dituzten onurak ikusiko dituzte. Bisita amaitzeko, arrainarekin egindako pintxoa eta fruta anitzeko zukua dastatuko dituzte.

Tailer Sentsorialak 2008az geroztik egiten dira, eta urtero Lehen eta Bigarren Hezkuntzako 3.500 ikasle inguruk hartzen dute parte. Irakasleek eta bertaratzen diren ikasleek oso ondo baloratzen dituzte.

Mercabilbao Eskolako Tailer Sentsorialeko bisita-programa beste bisita-programa batekin osatzen da. Programa hori astelehenetan gauzatzen da, eta lanbide-heziketako zentroek, ostalaritza-eskolek, adinekoen elkarteek eta abarrek parte hartzen dute.

Prentsa oharra deskargatu

MERCABILBAOK BASAURIKO METRO GELTOKIRA ERAMAN DU 50. URTEURRENEKO ERAKUSKETA

Mercabilbaok ibilbidea egiten jarraitzen du Metro Bilbaon bere 50. urteurrena ospatzeko, eta argazki eta informazio erakusketa Basauriko geltokira eman du (Bidasoa irteera). 2021eko urriaren 31a arte egongo da ikusgai.

Erakusketak ibilbidea egiten du Elikadura Unitatearen mugarri historiko eta estrategikoetan zehar. Iberiar penintsularen iparraldeko erreferentea da, elikagaiak banatzeko duen gaitasunarengatik eta kokapen estrategikoarengatik, toki, estatu eta nazioarte mailan.

Historia duten 13 panel

13 paneleko ibilbide baten bidez, erakusketak merkatuaren jatorriaren une historikoak biltzen ditu, handizkako arrainaren salmenta Erriberako Merkatuaren behealdean eta fruta eta barazkiak inguruetan eta gertu dagoen Erronda kalean zeuden garaikoak. Bilboko itsasadarreko elikagaiak banatzeko bi gune estrategiko; bertatik nekazaritzako produktuak, barazkiak, hegaztiak, haragia eta arraina saltzen ziren. Hari narratiboak duela 50 urte Basauriko lurretan zegoen Mercabilbaoren hastapenetan zentratutako bi panelekin jarraitzen du, merkatuko unerik suntsitzaileenetako batera iristeko: 1983ko uholdeetara. 80ko hamarkadan eta ondorengoetan, instalazioak suspertu egin ziren, eta, berreraikuntzarako eta modernizaziorako ahalegin, dedikazio eta baliabideekin, Mercabilbao 2021era arte iritsi da, itxaropenez betetako etorkizunerako ikuspegiarekin, Bilboko eta inguruko eraldaketa ekonomiko eta soziala sustatzeko gai den zerbitzu-enpresa publiko gisa.

Ildo horretan, erakusketak elikagaien hornidura merkatuaren plan estrategikoaren erreferentzia-puntuak ere ikusarazten ditu. Iraunkortasunarekin eta erantzukizun sozialarekin, kontsumo arduratsuarekin eta elikagaien eta ingurumenaren xahuketaren kontra duen konpromisoa; hurbileko merkataritzari eta ostalaritzari laguntzea, instalazioetan dauden handizkako enpresen bezero nagusi gisa, hori baita Mercabilbaoren izateko arrazoia.

1971ko maiatzaren 3an, Arrain eta Fruta eta Barazki Merkatu Zentralak jarri ziren martxan Elikadura Unitatean, Basauriko Artunduagako zelaien egungo kokalekuan. 2021eko egun horretan bertan, Elikagaien Unitateak, Zazpikaleetako geltokian (Unamunoko irteeran) erakusketa bat inauguratuz ospatu zituen urrezko ezteiak, eta, ondoren, erakusketa Bilboko Metroaren beste geltokitara lekualdatu zen. Hala ere, Erriberako Merkatuan ikusgai egon da, elikagaien banaketaren jatorrietara itzuliz.

Prentsa oharra deskargatu

BILBOKO PORTUAK ETA MERCABILBAOK FRUIT ATTRACTIONERA ERAMANGO DUTE BERE INPORTAZIO- ETA ESPORTAZIO-HUB ESKAINTZA

Aurten ere, Bilboko Portuak barazki eta frutaren logistika eta garraioa egiteko bere proposamena eramango du Fruit Attractionera, Madrilen urriaren 5etik 7ra bitartean egingo den fruta- eta barazki-esportatzaile eta -inportatzaileekiko topagunea. Helburua, estatuko eta nazioarteko operadoreen aurrean Penintsulako iparraldean elikagai-hub gisa duen posizioa sendotzea eta fluxuak handitzeko aukera berriak aztertzea.

Bere eskaintza intermodalari, salgai-mota horietan duen esperientziari eta Mercabilbaorekin batera egiten duen elkarlanari esker, Bilboko Portuak Erdialdeko Amerika, Hego Amerika eta Hego Afrika bezalako lekuetako barazki- eta fruta-trafikoa bideratzen du, baita Espainiako hainbat lekutakoa ere, Europa eta Penintsulako beste leku batzuetara.

Bilboko Portuak urtean 170.000 tona fruta eta barazki inguru mugitzen ditu; horietatik % 90 inguru esportazioak dira, eta gainerako % 10a, inportazioak. Sail nagusien artean barazki izoztuak; tipulak, baratxuriak eta porruak; eta zitrikoak nabarmentzen dira, reefer edukiontzien trafiko handia duela.

Helmugako herrialde nagusiak Erresuma Batua eta Irlandako Errepublika dira, fruta- eta barazki-esportazioen % 84 inguru biltzen dituzten merkatuak. Izan ere, Bilboko Portua liderra da Estatuan itsas garraioan, Europako Iparraldearekin eta Erresuma Batuarekin. Azken merkatu horretan, zerbitzuak indartu dira eta izapideak arindu, Brexita indarrean sartzeak sortutako behar berriei aurre egiteko.

Bilboko Portuak Fruit Attractionera eramanen dituen fruta eta barazkien inportazio eta esportaziotik eratorritako trafikoari erantzuteko zerbitzuen artean, e-puertobilbao nabarmentzen da, prozesuak eta eragiketak arintzeko bezeroei eskaintzen dien plataforma telematikoa.

Azpiegiturei dagokienez, Estatuko iparraldeko edukiontzi-terminal garrantzitsuena du Bilboko Portuak, eta, era berean, sakonera handienekoa, CSP Iberian Bilbao Terminalek kudeatua. Terminala Europako iparraldeko portu nagusiekin lotuta dago, 540 entxufe-hartune ditu reefer edukiontzietarako eta eragiketa guztia, produktu freskoen garraiolariena barne, bizkortzen eta errazten duen sarbide automatizatu bat du; 550 metro eta lau bideko tren-terminal bat ere badu. Edukiontzien terminal bati eskatzen zaizkion segurtasun-estandarren gainetik dagoenez, aduana sinplifikatzeko eta babesa eta segurtasuna emateko Operadore Ekonomiko Baimenduaren (OEB) baimena lortu du.

Gainera, kokapen honek ro-ro eta xede anitzeko terminalak eta galkorren biltegiak ditu. Alde batetik, Frioport hotz-terminalak 4.800 metro koadro ditu, 16.300 metro kubikoko edukiera duten bi izozte-ganbera -25 gradutan eta 7.500 metro kubikorako edukierako hiru hotz-ganbera positibo.

Progecok, berriz, salgaiak biltegiratu eta lekuz aldatzeko bi instalazio ditu, 6.000 metro koadroko hotz positiboa osatzen dutenak. Gainera, enpresa honek hozkuntzako edukiontziak biltegiratu, mantendu eta konpontzen ditu. Horretarako, egituran nahiz hozteko makinetan edozein gorabeherari erantzuten dioten profesionalak ditu, hotz-katearen itxaronaldiak eta hausturak saihesteko ontzi-enpresei eta sektoreko bezero guztiei urteko 365 egunetan zerbitzua ematen dutenak. Progeco fabrikatzaile nagusien (Carrier, Thermoking, Star Cool eta Daikin) dealer (zerbitzu tekniko ofiziala) bakarra da Espainiako iparraldean.

Era berean, Bilboko Portuak Mugako Kontroleko Postu / Border Control Point bat (MKP) du, Espainiako portuen artean abangoardian dagoena; edukiera handiko instalazio bat, 16 sarbide dituena; 24 orduz funtzionatzen du, eta gaikuntza hauek eskaintzen ditu: MKP, deskarga-portua, PED (Sarrera-puntu izendatuak), PED/PDI (Zenbait hirugarren herrialdeetako elikagaien kontrolerako puntuak), erradioaktibitatea, RAH (Gaitutako aduana-barrutiak) eta PPI (Lehen aldiz sartzeko puntuak).

Mercabilbao, baratzezaintza eta frutagintza merkaturatzearen zifra historikoak

2020an, fruta eta barazkien komertzializazioa 233.600 tonatik gorakoa izan zen Mercabilbaon, urtez urte handitzen den Kopuru, eta 2021. urterako, merkaturatze-zenbaki historikoak lortzeko bideari jarraitzen diote aurreikuspenek.

Fruta eta Barazkien Merkatu Zentralak gaur egun dauden lekuan kokatu zenetik 50 urte betetzen diren urte berezi honetan, Mercabilbao Fruit Attractionera itzuliko da Bilboko Portuaren eskutik, baratzezaintzako eta frutazaintzako sektorean duen nazioartekotze-estrategia bateratuari balioa emateko.

Izan ere, Elikagaien Unitateak kokapen estrategikoa du, Paris-Hendaia-Madril ardatzaren elkargunetik oso hurbil, Kantauriko autobiaren ondoan, eta zuzeneko lotura autobideen sarearekin. Autobide horiek, Bilboko Portuarekin batera, puntu ezin hobea dira nazioartera eraginkortasunez eta kalitatez hedatzeko estrategia bat gauzatzeko. Fruta eta barazkien sektoreko operadoreentzat lehiakortasunerako abantaila da, bai baliabideen, ekonomiaren, denboraren, eskura dauden azpiegituren edo biltegi logistikoen ikuspegitik.

Prentsa oharra deskargatu

MERCABILBAO BERE JATORRIRA ITZULIKO DA, BERE 50. URTEURRENA OSPATZEKO ERRIBERAKO MERKATUAN EGINGO DEN ARGAZKI ERAKUSKETA BATEKIN

Gaur egun hartzen duen lekuan 50. urteurrena ospatzen duen urtean, Penintsulako iparraldeko elikagaien banaketa-zentro moduan erreferente den Mercabilbao bere jatorrira itzuliko da, irailean zehar Erriberako Merkatuan argazki eta informazio erakusketa bat instalatuz (hilaren 30era arte ikusi ahal izango da). Erakusketa 10 panelek osatzen dute, eta Bilboko merkatuaren irudi historikoekin hasten da. Garai hartan handizkako arrainaren salmenta instalazioen beheko aldean zegoen, eta fruta eta barazkiak, hegaztiak eta haragia inguruan eta hurbileko Erronda kalean zeuden. Ibilbide horrek Erribera Plaza zaharraren eta haren inguruaren hasierara garamatza. Puntu horiek estrategikoak ziren Gaztelako Erresumako eta itsasoz haraindiko merkantziak merkaturatzeko. Bilboko itsasadarreko urak zeharkatuz garraiatzen ziren.

Gauzak horrela, hari narratiboak Mercabilbaok gaur egungo kokalekuan egin zituen lehenengo urteetan zentratutako panelekin jarraitzen du, 1971n eta ondorengo urteetan, hain zuzen ere. Garai hartan Arrain eta Fruta eta Barazki Merkatu Nagusiak Bilboko Erriberatik Basauriko Artunduagako zelaietara eraman ziren, duela 50 urteko maiatzean.

Erakusketak Merkatuaren mugarri suntsitzaileenarekin jarraitzen du: 1983ko uholdeekin. 80ko hamarkadan eta ondorengoetan, instalazioak suspertu egin ziren, eta, berreraikuntzarako eta modernizaziorako ahalegin, dedikazio eta baliabideei esker. Mercabilbao etorkizunerako itxaropen handiko ikuspegiarekin iritsi da 2021era. Bilboko eta inguruko eraldaketa ekonomiko eta soziala sustatzeko gai den zerbitzu-enpresa publikoa.

Ildo horretan, erakusketak elikagaien hornidura Merkatuaren plan estrategikoaren erreferentzia-puntuak ere erakusten ditu. Iraunkortasunaren eta erantzukizun sozialaren, kontsumo arduratsuaren eta elikagaien eta ingurumenaren xahuketaren aurrean duen konpromisoa; eta hurbileko merkataritzari eta ostalaritzari ematen dion laguntza, horiek direlako instalazioetan dauden handizkako enpresen bezero nagusiak eta Mercabilbaoren izateko arrazoia.

1971ko maiatzaren 3a Mercabilbaoren egutegian gorriz markatutako eguna da. Hori dela eta, 2021eko egun berean hasi zen bere urrezko ezteiak ospatzen, Merkatua Bilboko eta Bizkaiko gizarte osora hurbilduz, Bilboko Metroaren Zazpikaleetako geltokia izan zen erakusketa ibiltari horren lehen geltokia, eta lur azpiko trenbidearen hainbat geltokitan bidaiatzen jarraitu du, Erriberako Merkatuan amaitu arte.

Prentsa oharra deskargatu

MERCABILBAOK BILAKAERA POSITIBOA IZAN DU, 2021EKO LEHEN SEIHILEKOAN 135.502 TONA BAINO GEHIAGO MERKATURATU BAITITU

Mercabilbao sozietate publikoa gero eta sendoago dago Iberiar Penintsulako iparraldeko elikagai-horniduraren erreferente gisa. Urtez urte, merkaturatze-datuek hala erakusten dute. Izan ere, 2021eko urtarriletik ekainera 135.502,3 tona saldu zituen, 2020ko epe berean baino % 0,05 gutxiago eta 2019an baino % 2,37 gehiago. “Despentsa handi” horren bilakaerak modu positiboan egin du aurrera, eta goranzko aurreikuspenak ditu, 2020ko 256.690 tonatik gorako datu historiko berriekin amaitzeko.

Sektoreka, nabarmentzekoa da frutaren eta barazkien merkaturatzearen hazkundea; izan ere, 2020ko lehen seihilekoaren eta 2021aren artean salmentak % 0,17 baino jaitsi ez diren arren (aurten 124.020,6 tona merkaturatu dira), 2019arekiko igoera % 3,2koa izan da. Datu horiek berretsi egiten dute, beste behin ere, “bertako produktuen kontsumoak izan duen bilakaera, gertuko fruta-denden salmentak gora egin duelako; izan ere, aurreko urteko konfinamenduaren hasieran, pertsonek gehiago kontsumitzen zuten euren etxeetan. Ohitura hori geratzeko etorri da, herritarrek euren ‘auzoko’ saltokiek eskaintzen dituzten produktu fresko eta osasungarriak begi onez ikusten dituztelako, Mercabilbaoko handizkako enpresen kalitate-zigiluarekin”, Elikadura Unitatetik adierazi dutenez.

Arrainaren eta itsaskiaren kasuan, 2021eko urtarriletik ekainera, itsasoko produktuen merkaturatzea 11.481,6 tonakoa izan da, 2020ko epe berean baino % 1,3 handiagoa eta 2019an baino % 7,4 txikiagoa. 2020ko eta 2021eko aldi batzuetan ostalaritza itxita egon izana da 2019ko, COVID-19aren pandemiaren aurreko urteko, ondorengo datuak azaltzeko funtsezko arrazoia. Mercabilbaotik adierazten den bezala, “itsasoko produktuen salmentak behera egin du azken urtean, baina, 2020ko eta 2021eko datuak ikusita, bilakaera goranzkoa da berriro, batez ere Mercabilbaon erosten duen ostalaritza-sektorea ia osorik ireki delako (jatetxeak eta catering-zerbitzuak, batez ere) eta herritarrek konfiantzazko arrandegietara joaten jarraitzeko apustu irmoa egin dutelako.

Gehien kontsumitzen diren produktuak eta haien jatorria

Frutari dagokionez, kontsumitzaileek ohitura berberak dituzte, eta ez da ezer aldatu aurreko urteekin alderatuta: banana, laranja eta sagarra dira oraindik protagonistak. Barazkien kasuan, tomatea, letxuga eta azalorea nabarmentzen dira. Fruta eta barazki guztietatik, gehienak estatu-jatorrikoak dira (% 86 inguru), eta gainerakoak inportatuak.

Arrainari dagokionez, antxoa, legatza, txitxarroa, oilarra eta hegaluzea dira produktu nagusiak, eta itsaskiari dagokionez, muskuilua, barraskiloa eta txirla. Bizkaiko Golkoko portuek arrain freskoaren hornitzaile nagusiak izaten jarraitzen dute, Galiziaren aurretik; Galiziako portuak dira, berriz, itsaski gehiena hornitzen dutenak.

Uda, fruta hezurdun eta freskagarriaren garaia

Uda sasoian, fruta da gehien eskatzen den produktuetako bat, eta gure auzoetako fruta-dendak “hezurdun fruta” delakoaz eta udan ohikoak diren beste batzuez betetzen dira. Mercabilbaon, produktu arrakastatsuenak mertxika, nektarina, paraguaioa, meloia, sandia eta udako udareak dira.

Arrainaren kasuan, sasoi betean, hegaluzea nabarmentzen da, bere zapore eta kalitatearengatik, arrain hori baita, zalantza barik, arrandegietako protagonista.

Prentsa oharra deskargatu

MERCABILBAOK BILBOKO METROAREN GURUTZETAKO GELTOKIRA ERAMAN DU 50. URTEURRENEKO ERAKUSKETA

Mercabilbao berriro igo da Bilboko Metrora, bere 50. urteurrena ospatzen jarraitzeko. Argazki eta informazio erakusketa Gurutzetako geltokira eramango da, eta bertan ikusi ahal izango da uztailaren 31ra arte.

Erakusketak ibilbidea egiten du Elikadura Unitatearen mugarri historiko eta estrategikoetan zehar. Iberiar penintsularen iparraldeko erreferentea da, elikagaiak banatzeko duen gaitasunarengatik eta kokapen estrategikoarengatik, toki, estatu eta nazioarte mailan.

Historia duten 13 panel

13 paneleko ibilbide baten bidez, erakusketak merkatuaren jatorriaren une historikoak biltzen ditu, handizkako arrainaren salmenta Erriberako Merkatuaren behealdean eta fruta eta barazkiak inguruetan eta gertu dagoen Erronda kalean zeuden garaikoak. Bilboko itsasadarreko elikagaiak banatzeko bi gune estrategiko; bertatik nekazaritzako produktuak, barazkiak, hegaztiak, haragia eta arraina saltzen ziren. Hari narratiboak duela 50 urte Basauriko lurretan zegoen Mercabilbaoren hastapenetan zentratutako bi panelekin jarraitzen du, merkatuko unerik suntsitzaileenetako batera iristeko: 1983ko uholdeetara. 80ko hamarkadan eta ondorengoetan, instalazioak suspertu egin ziren, eta, berreraikuntzarako eta modernizaziorako ahalegin, dedikazio eta baliabideekin, Mercabilbao 2021era arte iritsi da, itxaropenez betetako etorkizunerako ikuspegiarekin, Bilboko eta inguruko eraldaketa ekonomiko eta soziala sustatzeko gai den zerbitzu-enpresa publiko gisa.

Ildo horretan, erakusketak elikagaien hornidura merkatuaren plan estrategikoaren erreferentzia-puntuak ere ikusarazten ditu. Iraunkortasunarekin eta erantzukizun sozialarekin, kontsumo arduratsuarekin eta elikagaien eta ingurumenaren xahuketaren kontra duen konpromisoa; hurbileko merkataritzari eta ostalaritzari laguntzea, instalazioetan dauden handizkako enpresen bezero nagusi gisa, hori baita Mercabilbaoren izateko arrazoia.

1971ko maiatzaren 3an, Arrain eta Fruta eta Barazki Merkatu Zentralak jarri ziren martxan Elikadura Unitatean, Basauriko Artunduagako zelaien egungo kokalekuan. 2021eko egun horretan bertan, Elikagaien Unitateak, Zazpikaleetako geltokian (Unamunoko irteeran) erakusketa bat inauguratuz ospatu zituen urrezko ezteiak, eta, ondoren, erakusketa Bilboko Metroaren Indautxuko geltokira lekualdatu zen.

Prentsa oharra deskargatu

Nabarmendutako gaurkotasuna

Albistea

Obrak sarrera nagusian, kobrantza-puntu berriak instalatzeko

Gehiago irakurri

Iragarki ofiziala

Akzio propioak amortizatzeagatik kapitala murrizteari buruzko iragarkia

Gehiago irakurri

Prentsa oharra

MERCABILBAOK IKASTETXEEI ZUZENDUTAKO ELIKAGAIEN TAILER SENTSORIALAK HASI DITU BERRIRO

Gehiago irakurri

Urteko txostena

2020 urteko txostena

Deskargatu

Sartu bideoen atalera

Ikusi bideoak

Argitalpena

2020 urteko txostena

Deskargatu

Norberaren cookieak, hirugarrenenak eta nabigazio-ohiturak aztertzekoak erabiltzen ditugu gure zerbitzuak hobetzeko informazioa biltzeko Nabigatzen jarraitzen baduzu, haien instalazioa onartzen duzu. Cookieak konfiguratu ditzakezu zure nabigatzailean, baina horrek nabigatzeko zailtasunak eragin ditzake webgunean.

Nola konfiguratu Onartu