Prentsa eta argitalpenak | Prentsa-oharrak

Prentsa-oharrak

MERCABILBAO MERKATU JASANGARRIAGORAKO BIDEAN DOA, 2021EAN 257.100 TONA BAINO GEHIAGO MERKATURATUTA

50 urtez egindako bidearekin eta ziklo berri baten hasieran murgilduta, Mercabilbaok aurrera jarraitzen du gero eta jasangarriagoa den kudeaketa-eredurantz, Iberiar Penintsulako iparraldeko elikadura-hornidurako erreferentziazko zentroa izaten jarraitzeko. 2021eko itxierako merkaturatze-datuek, 257.194 tona guztira, hala erakusten dute.

2021eko jardueraren balantzea Batzar Nagusian aurkeztu zen. Bertan elkartu ziren Juan Mari Aburto Bilboko alkatea buru den Gobernu Kontseiluko kide guztiak.

Sektoreka, fruten eta barazkien salmentak hazten jarraitzen du, eta merkaturatzeari buruzko datu historikoak lortu ditu: 234.119 tona, hau da, aurreko ekitaldian baino % 0,2 gehiago. Frutei dagokienez, laranjaren (34.407 tn), bananaren (25.547 tn) eta sagarraren (21.427 tn) salmentak nabarmendu behar dira. Barazkiei dagokienez, patataren (16.411 tn), tomatearen (16.915 tn) eta tipularen (5.261 tn) kontsumoa nabarmendu behar da. Iaz merkaturatutako fruta eta barazki guztietatik, gehienak estatuan ekoiztutakoak izan ziren, eta gainerakoak inportatuak.

Arrain, itsaski eta itsasoko produktu izoztuen merkatuak, bestalde, 22.489 tona bildu zituen guztira, hau da, 2020an lortutako datuak baino % 2,44 gutxiago. Atzerakada hori arrain freskoaren eta izoztuaren salmentan izandako beherakadak eta herritarren erosteko eta kontsumitzeko ohituren eraldaketak eragin dute. Itsaskietan, berriz, merkaturatzeak zertxobait egin du gora aurreko urtearen aldean. Aipatzekoa da Bizkaiko Golkoko portuek jarraitzen dutela arrain freskoaren hornitzaile nagusiak izaten Galiziaren aurretik; bitartean, Galiziako portuak dira itsaski gehienen hornitzaileak.

Fruta eta barazkien eta arrain, itsaski eta itsasoko produktu izoztuen prezioak aurreko urteetakoen antzekoak dira.

Balio anitzeko sektoreak elikadura orokorreko produktuak biltzen ditu, hala nola arrautzak, haragiak, esnekiak eta elikagaiak orokorrean. Guztira, 586 tona pilatu zituen, aurreko urteetako zifrak nabarmen jaitsiz, banaketan aritzen ziren biltegi batzuen jarduera-aldaketaren ondorioz, batez ere.

Mercabilbaok Basauriko Artunduagako zelaietan errendimendu betean jarduten duenetik urrezko ezteiak ospatu dituen urtean, elikagaien hornikuntzarako merkatuak mila pertsona baino gehiagori eman die lana, % 100 inguruko okupazioari eutsi dio eta guztira 110 enpresak betetzen dute euren lana 13 hektareako azalera duten instalazioetan. 2021eko abenduaren 31rako, Elikagai Unitateak 621.523 ibilgailu hartu zituen.

Kudeaketa-eredu jasangarriagoa

Gero eta merkatu jasangarriagoa lortzeko ahaleginean, Mercabilbaok konpromisoa hartu du Garapen Jasangarriko Helburuekin (GJH), hau da, Nazio Batuek pertsonen, planetaren eta oparotasunaren alde 2030erako ezarri duten ekintza-planarekin.

  1. urtea hausnarketa-urtea izan zen Elikagai Unitatearentzat, eta mundu osorako markatutako 17 GJHak txertatu zituen bere kudeaketa ereduan; izan ere, egunero-egunero ari da lanean, bere errealitateen, ahalmenen eta garapen-mailen arabera. 

GARAPEN JASANGARRIARI BURUZKO MERCABILBAOREN HELBURUAK

  • Merkatu Sareko handizkako eskaintzan tokiko eta ziklo laburreko ekoizpenen presentzia areagotzea, ekoizleek eta kooperatibek merkataritza-katean inplikazio handiagoa izan dezaten.
  • Sasoiko elikagai freskoen eta ekoizpen ekologikotik datozenen eskaintzaren hazkundea sustatzea.
  • Txikizkako merkataritzari eta ostalaritzari zuzendutako zerbitzu logistiko integratuko eta banaketa-kapilarreko ekimenak sustatzea, garraioa eta erregaien kontsumoa murrizteko eta hirietako trafikoa hobeto kudeatzeko.
  • Dieta mediterraneoari eta Espainiako elikagaiei lotutako elikagai osasungarrien kontsumoa sustatzeko elikadura-kulturako ekintzak koordinatzea.
  • Merkatuetan fruta, barazki, arrantza-produktu eta haragien eskaintzan ahalik eta barietate eta kalitate handiena egotea bultzatzea; merkataritza-formatu guztietan Merkatu Saretik datozen elikagaien presentzia sustatuz: denda espezializatuetan, supermerkatuetan, hipermerkatuetan eta merkataritza elektronikoan, bai eta jatetxeetan eta erakundeen kontsumoan ere.
  • Elikagaien hondakinak murrizten lagunduko duten jarduketak sustatzea, bai eta Merkatu Sareak Elikagaien Bankuekiko eta antzeko beste erakunde batzuekiko ekintza solidarioetan inplikazio handiagoa izatea ere.
  • Elikadura kateko merkataritza-zikloaren fase guztietan berrikuntza teknologikoa eta eraldaketa digitala bultzatzea.

Memoria osoa hemen: www.mercabilbao.eus

 

Prentsa oharra deskargatu

ORTUELLAKO HERRIAK, ELIKAGAIEN INDUSTRIAN ETA ZERBITZU AURRERATUETAN ESPEZIALIZATUTAKO CAMPUS AITZINDARIA IZANGO DU EZKERRALDEA-MEATZALDEA TEKNOLOGIA PARKEAN

Bizkaiko Ortuella herriak, enpresa berritzaileak eta elikagaien startupak garatzeko eta erakartzeko gune bakar gisa sortutako campus aitzindaria izango du Ezkerraldea-Meatzaldea Teknologia Parkean, Euskadiko garapen sozioekonomikorako estrategikotzat jotzen den sektore horren hazkundea bultzatuz. Eusko Jaurlaritzaren, Bizkaiko Foru Aldundiaren, Ortuellako eta Bilboko udalen eta Euskadiko Parke Teknologikoen Sarearen arteko baterako ekimena da (Bilboko Udala Mercabilbaoren bazkide nagusia da Mercasarekin batera), .

Ekimenak lotura zuzena du Euskadiko RIS3 estrategiarekin eta Euskadiko Parke Teknologikoen Sarearen 2024 Plan Estrategikoan ezarritako jarduketa-ildoekin. Halaber, Energian zentratutako Abanto-Zierbenako Campusa abiarazteak Ezkerraldea-Meatzaldea Teknologia Parkearen hazkundea bultzatzen du.

Hasierako proiektuaren arabera, Ezkerraldea-Meatzaldea Teknologia Parkearen campus berri horrek 50 hektarea inguruko eremua hartuko du, etorkizunean hedatzeko egokia den ingurunean. Bertan, goi mailako errepide, trenbide eta itsas konexioak bermatu ahal izango dira, Parkearen jarduera indartzeko eta erreferentziazko elikadura-gune gisa duen posizioa bultzatzeko. Lursaila erosteko eta urbanizazio-obretarako 60 milioi euroko inbertsioa aurreikusi da. Gaur egun, Parke Teknologikoen Sarea 135.000 m2-ren jabe da, eta 500.000 m2-rainokogainerakoa eskuratze-prozesuan dago.

Parkearen barruan Elikagai Campusa garatzearen helburu nagusia elikaduraren potentzial ekintzailea aktibatzea da, oinarri teknologikoko enpresa eta proiektu berritzaileei, euskal ekoizpen-sektorean trakzio-ahalmena duten elikagai-enpresen negozio-ildoei edo elikadura-kate osoak sortzen lagunduko duten enpresa-ekimenei laguntza eta sostengu indibidualizatua emanez, eta, horrela, Euskadi kanpoko proiektu eta inbertsio berriak erakartzeko ingurune erakargarri bihurtzea ahalbidetuz.

ELIKADURA CAMPUSEKO ZERBITZU AURRERATUAK

Elikagaien Campusak zerbitzu bereizgarri hauek eskainiko dizkie lehiakortasuna indartu eta berrikuntzaren, digitalizazioaren eta jasangarritasunaren alorrean etengabeko hobekuntzarako guneak sortu gura dituzten enpresei:

  1. Lehengaien, ekoizpen-prozesuen eta amaitutako produktuen Kalitatea kontrolatzeko plataforma zentralizatua
  2. Planta pilotu erdi-industriala, ekoizpenerako eta merkaturatu aurreko kontzeptu-probak gauzatzeko.
  3. Laneko arriskuak prebenitzeko eta minimizatzeko zerbitzuen plataforma.
  4. Industria-prozesuen optimizazioa digitalizazio- eta automatizazio-zerbitzu aurreratuen bitartez.
  5. Prestakuntza aurreratuko zentroa.
  6. Kontsumitzaileen plataforma produktuak balioztatzeko.
  7. Input-en (ura, energia) kontsumoa murrizteko eta urritzeak minimizatzeko zerbitzu aurreratuak.
  8. Azpiproduktuak kudeatzeko eta balioztatzeko zerbitzu aurreratuak.
  9. Prototipoetarako eta garapen berrietarako plataforma.

Horrela, campus hau sortzea beste pauso garrantzitsu bat da ekosistema kohesionatuagoa eta balio erantsi handiagokoa eraikitzeko bidean, Euskadi nazioarte mailan elikaduraren erreferentziazko lurraldetzat finkatzeko. Ekonomia- eta ezagutza-eragile guztien arteko lankidetza-proiektua da: zentro teknologikoak, erakundeak eta enpresak.

Modu berean, proiektu garrantzitsu horrek, Euskadi talentua, kapitala eta enpresa berriak erakartzeko gune bihurtzea helburu duen “The Food Global Ecosystem: Elikadura-ekosistema Segurua, Jasangarria eta Osasungarria” ekimena osatzen du.

Elikagaien sektorea oso esanguratsua da euskal ekonomian, eta ezagutzari eta berrikuntzari dagokienez intentsiboa den ekosistemak osatzen du. Gaur egun, Euskadiko Barne Produktu Gordinaren % 11,5 hartzen du, 100.000 enplegu inguru sortzen ditu eta 4.400 milioi euro fakturatzen ditu. Babes publikoa funtsezkoa izan da pisu ekonomiko nabarmen hori lortzeko eta sektoreak duen dinamismoa sustatzeko.

EUSKADIKO PARKE TEKNOLOGIKOEN SAREAREN ELIKADURA-EKOSISTEMA

Nekazaritza-elikadura Euskadiko Parke Teknologikoen Sarearen barruan hazten ari den ekosistema da, eta indartu egin da oso teknologikoak diren eta eremu horri lotuta dauden eta elikadura-proiektu iraunkor eta osasungarrietara oso bideratuta dauden enpresak sartuz. Parkeak oso ekosistema egokiak dira osagai teknologikoa duten food eremuko proiektuak abian jartzeko eta garatzeko.

Berrikuntza-ekosistema horren barruan, Hazi sozietate publikoa, Euskadiko Parke Teknologikoen Sarean dauden Basque Research and Technology Allianceko (BRTA) zentro teknologikoak (NeikerTecnaliaAztiGaiker eta Tekniker) eta Basque Culinary Center, unibertsitate mailako prestakuntza zentro gisa, eta haren barruan dagoenGastronomia zentro teknologikoa daude. Sektorearen garapen teknologikoa sustatzeko eta ezagutza sortzeko oso erakunde kualifikatuak dira.

Teknologia lagungarria ari da izaten baserriko elikagaietatik mahairako bidaian, eta elikagaien industriak berebiziko garrantzia du prozesu horretan, sektoreko enpresen lehiakortasuna modu estuan erlazionatutabaitago teknologia berriak aplikatzeko duten gaitasunarekin.

Horrela, zenbait enpresek, startupek eta beste eragile batzuek osatzen dute Parkeen Sareko nekazaritzako elikadura-ekosistema hau: Kupah Healthy Araban; AleoVitro, AvanzaBio, Celavista, Bolton Food, EIT Food, Biofungitek, Basque Food Clusterra, Biolan, Aberekin, Insekt Label, Innomy, Phagelab, Itsas Garapen Elkartea eta Derio Nekazaritza Eskola Bizkaian; eta ACT, Biotech Foods, Kaiku, Gaztaren Institutua, Acuipharma, Orain Sdum, Pernod Ricard Winemakers, Farsens eta Blue Agro Gipuzkoan.

MERCABILBAO,ETORKIZUNEKO TRAKZIO-PROIEKTUA

Euskadiko Elikagaien Campusak Mercabilbao hartzea aurreikusten du, proiektuaren elementu bultzatzaile gisa, produktu galkorren hornikuntzan eta banaketan esperientzia handia duten enpresa operadore multzoaren partaidetzaren bitartez. Horiek guztiak ezinbestekoak dira herritarren elikadurarako, COVID-19aren ondoriozko konfinamenduaren unerik kritikoenetan egiaztatu ahal izan zen bezala.

Mende erdi pasatxo igaro da Basauriko Artunduaga auzoan Mercabilbaoko instalazioak inauguratu zirenetik. Merkatuaren jardueraren bilakaerak berak, eta egungo instalazioak handitzea ezinezkoa izateak, nekazaritzako elikagaien sektoreko hainbat jarduera elkarrekin eman ahal izango diren ingurunera lekualdatzea aholkatzen dute, kontzentrazio-sinergia garrantzitsuak lortuz. Besteak beste, 4. eta 5. gamako produktuak elaboratzeko eta kontserbatzeko prozesuak hobetzeko proba-banku gisa balio du, bai eta salmentarako dauden kanalen bitartez banatzeko ere.

Mercabilbao elikadura-campus berri horretara lekualdatzean, gaur egun Basaurin dagoen banaketa-zentroaren hedapena biderkatu egingo da bere beharrei erantzuteko, eta une honetan hartzen duen 13 hektareako lursaila aukera-lurzoru berri bihurtuko da Basaurirentzat. Eusko Jaurlaritza, Bizkaiko Foru Aldundia eta Basauriko Udala libre geratuko deneremu horretan jarduera ekonomikoa eta enplegua sortzen jarraitzeko ahaleginetan ari dira.

Mercabilbaok, gaur egun, ehun bat enpresa ditu bere instalazioetan, eta 1.200 pertsonari ematen die enplegu zuzena. Urtean 260 mila tona produktu galkor merkaturatzen ditu, gehienak bertako merkataritzarako eta ostalaritzarako.

Prentsa oharra deskargatu

BILBOKO PORTUAK ETA MERCABILBAOK FRUTA- ETA BARAZKI-HUB GISA DUTEN ESKAINTZAREN BERRI EMANGO DUTE BERLINEN

Bilboko Portuak eta Mercabilbaok Fruit Logistica Berlinen parte hartuko dute apirilaren 5etik 7ra, fruta eta barazkien trafiko berriak erakartzeko. Ekitaldi hau sektoreko Europako topagune nagusia da eskaintza eta eskaria hurbiltzeko. Bizkaiko ordezkariek bi azpiegituren indarguneak eta dituzten zerbitzuak ezagutaraziko dituzte. “Helburua – Bilboko Portuko Agintaritzatik diotenez – merkatua zabaltzea da, eta operadoreei Espainiako iparraldean dugun posizioa helaraztea, Hego Amerikaren eta Europaren arteko atea izatea ahalbidetzen diguna”.

Bere itsas zerbitzuen kopuru zabalari, eskaintza intermodalari, galkorren trafikoan izandako esperientziari eta hotzetarako azpiegiturei esker, Bilboko Portuak Erdialdeko Amerika, Hego Amerika eta Hego Afrika bezalako lekuetako barazki- eta fruta-trafikoa bideratzen du, baita Espainiako hainbat lekutakoa ere, Europa eta Penintsulako beste leku batzuetara. Merkatuen artean, Erresuma Batua eta Irlandako Errepublika nabarmentzen dira, eta horiekin Bilboko Portua aitzindari da Espainiako itsas garraioan.

Inportaziotik eta esportaziotik eratorritako trafikoei erantzuteko zerbitzuen artean, nabarmentzekoa da bezeroei prozesuak eta eragiketak arintzeko eskaintzen dien plataforma telematikoa.

Azpiegiturei dagokienez, Estatuko iparraldeko edukiontzi-terminal garrantzitsuena du Bilboko Portuak, eta, aldi berean, sakonera handienekoa, CSP Iberian Bilbao Terminalak kudeatua. Terminala Europako iparraldeko portu nagusiekin lotuta dago, 540 entxufe-hartune ditu reefer edukiontzietarako, eta sarbide automatizatu bat du, eragiketa guztia bizkortzen eta errazten duena, produktu freskoen garraiolariena barne; eta 550 metro eta lau bideko tren-terminal bat ere badu.

Portu honek, gainera, ro-ro eta xede anitzeko terminalak eta galkorrentzako biltegiak ditu. Alde batetik, Frioport hotz-terminalak 4.800 metro koadro ditu, bi izozte-ganbera -25 gradutan, 16.300 metro kubiko, eta hiru hotz positiboko ganbera, 7.500 metro kubikorako edukierarekin.

Progecok, berriz, salgaiak biltegiratu eta lekuz aldatzeko bi instalazio ditu, 6.000 metro koadroko hotz positiboa osatzen dutenak. Gainera, hozkuntzako edukiontziak biltegiratu, mantendu eta konpontzen ditu. Horretarako, egituran eta hozteko makinetan edozein gorabeheren ardura hartzen duten profesionalak ditu. Profesional horiek urteko 365 egunetan lan egiten dute ontzi-enpresei eta sektoreko bezero guztiei zerbitzua emateko, hotz-katearen itxaronaldiak eta hausturak saihesteko. Progeco da fabrikatzaile nagusien (Carrier, Thermoking, Star Cool eta Daikin) dealer (zerbitzu tekniko ofiziala) bakarra Espainiako iparraldean.

Era berean, Bilboko Portuak Border Control Point / Mugako Kontroleko Postu bat (MKP) du, Espainiako portuen artean abangoardian dagoena; edukiera handiko instalazio bat, 16 sarbide dituena; 24 orduz funtzionatzen duena, eta gaikuntza hauek eskaintzen dituena: PCF, deskarga-portua, PED (sarrera-puntu izendatuak), PED/PDI (Zenbait hirugarren herrialdeetako elikagaien kontrolerako puntuak), erradioaktibitatea, RAH (Gaitutako Aduana-Barrutiak) eta PPI (Lehen aldiz Sartzeko Puntuak).

Mercabilbao, produktuak nazioartekotzeko posizio estrategikoa

Mercabilbao Iberiar Penintsulako iparraldeko eta Frantziako hegoaldeko elikagai galkorren banaketa-zentrorik handiena da, bere kokapen estrategikoari esker; Paris-Hendaia-Madril ardatzaren elkargunetik oso gertu dago, Kantauriko autobiaren ondoan, eta zuzeneko lotura du autobide-sarearekin; izan ere, autobide horiek, Bilboko Portuarekin batera, kokapen ezin hobean jarri dute kalitatezko nazioartekotze-estrategia eraginkorra gauzatzeko.

Alde horretatik, lehiarako abantaila da barazki- eta fruta-sektoreko operadoreentzat, bai baliabideen, ekonomiaren, denboraren, eskura dauden azpiegituren edo biltegi logistikoen ikuspegitik. Hain zuzen ere, 2021ean, Mercabilbaok 234.119 tona fruta eta barazki merkaturatu zituen, kopuru historikoak bere 50. urteurreneko urtean.

Bilboko Portuarekin aliantza horrek lehiarako abantaila bat dakarkio Elikagaien Unitateari barazki- eta fruta-produktuen trafikoa erakartzeko. Horri esker, Europako eta Ameriketako beste merkatu batzuekin harremanetan jar daiteke, batez ere Euskadi Akitania Euro-Eskualdeko jarduera bateratuen esparruan. Mercabilbaok eta Bordeleko Merkatu Nagusiak lankidetza estuan dihardute jarduera bateratuak garatzeko eta gizarteari zerbitzu hobea emateko.

Prentsa oharra deskargatu

MERCABILBAOK 505 TONA EMAN DIZKIO 2021EAN BIZKAIKO ELIKAGAIEN BANKUARI

Mercabilbaok pobrezia-egoeran dauden pertsonen alde bere hondar-alea ematearen aldeko apustua egiten jarraitzen du, are gehiago mundu mailako pandemiak markatutako 2021. urtean. Konpromiso eta lankidetza horren ondorioz, handizkako enpresek 505 tona elikagai eman zizkioten iaz Bizkaiko Elikagaien Bankuari. Ohikoa denez, dohaintza gehienak frutak eta barazkiak izan dira.

Guztira, Mercabilbaoko 23 enpresak egin gura izan dute ekarpena eta 2021ean irabazi-asmorik gabeko ongintza-erakundeari lagundu gura izan diote. Elikagaien Unitatearen instalazioetatik egindako dohaintza Bizkaiko Elikagaien Bankuak kudeatutako guztiaren % 34 da.

Bizkaiko erakundeak, bertako zuzendaritzak elikadura-zentroaren instalazioetan lagatako biltegi batetik gauzatzen du bere jardueraren zati bat. Bertan, boluntario talde batek sailkatu eta arin banatzen du handizkariek helburu sozialak dituzten erakundeei emandako elikagaien soberakina, hala nola, parrokia-zentroei, jantoki sozialei edo laguntza-zentroei.

Urtez urte, Mercabilbaok gero eta merkatu jasangarriagoa lortzeko ahaleginak areagotzen ditu eta elikagaien xahutzea prebenitzeko estrategiak indartzen ditu. Ildo horretan, gogorarazi dutenez “ez dago existitzen ez dena baino hondakin hoberik, eta Bizkaiko Elikagaien Bankuari dohaintza kudeatuz, gizarte-lanaz gain, ingurumen-onura ere lortzen dugu, hondakinak sortzea saihestuz”.

Prentsa oharra deskargatu

MERCABILBAOK BIZKAIKO ELIKAGAIEN BANKUAREN ALDEKO “50 URTE, 50 ERREZETA” LIBURUA AURKEZTU DU

Urte historiko bati amaiera emateko, Mercabilbaok amantala lotu du, suak piztu ditu eta lanari ekin dio “50 urte, 50 errezeta” liburu solidarioa eginez, mende erdia Bizkaiko gastronomiaren zapore onenekin ospatzeko. Bilboko eta Bizkaiko jatetxeetako sukaldariek eta Bilboko, Galdakaoko eta Leioako Ostalaritza Eskoletako sukaldariek egindako 50 sukaldaritza proposamenen sorta da. Errezeten artean, hasierakoak, arrain-, itsaski- eta haragi-plater nagusiak eta postreak biltzen dira.

Errezeta liburua gaur goizean aurkeztu dute Bilboko Erriberako Merkatuan Xabier Ochandiano Bilboko Udaleko Garapen Ekonomiko, Merkataritza eta Enplegu zinegotziak, Yolanda Díez Bilboko Udaleko Osasun eta Kontsumo zinegotziak eta Aitor Argote Ibánez Mercabilbaoko zuzendari nagusiak, Miguel Ángel Fernandino Bizkaiko Elikagaien Bankuko presidenteak, Rafael Gardeazabal Bilbao Dendak-eko presidenteak, Bizkaidendak-eko presidenteak, eta Andres Cebrecos-ek, liburuan parte hartu duten zenbait sukaldarik lagunduta.

Liburua hornidura merkatuaren izaera solidarioaren beste adibide bat da; izan ere, salmentarekin bildutako guztia Bizkaiko Elikagaien Bankura bideratuko da. Mercabilbao egunero ari da erakunde horrekin lankidetzan, duela 25 urte baino gehiagotik, bai handizkako enpresek elikagaiak emanez, bai Basauriko instalazioetan lokal bat lagaz.

Liburua banatzeko, Mercabilbaok Bilbao Dendak eta Bizkaidendak erakundeen laguntza du, eta bi erakunde horien barruan dauden saltokien eta enpresen bidez salduko da liburua, 5 euroko prezioan.

Mende erdiko historia euskal gastronomiaren zaporerik onenez beteta, hiribilduko jatetxe ezagunen eta Bizkaiko geografiako leku guztietako sukaldarien errezetei esker, baita Bilboko, Galdakaoko eta Leioako Ostalaritza Eskolen errezetei esker ere. Guztiek eskaini dituzte, modu desinteresatuan, euren sukaldaritza lanak, produktu freskoenez eta kalitatez, osagai hauekin egindakoak: arrainak, itsaskiak, frutak, barazkiak, haragia eta zaporerik gozoenak. “50 urte, 50 errezeta” liburuarekin, Mercabilbaok sukaldaritzan pauso bat ematera eta sukaldaritzarako dituzten dohainak probatzera gonbidatzen ditu herritarrak.

Prentsa oharra deskargatu

MERCABILBAOK 2021EAN DATU HISTORIKOAK LORTZEA AURREIKUSI DU, ABENDUAN IA 22.000 TONA MERKATURATUTA

Basaurin egungo instalazioak martxan jarri zirenetik 50 urte bete direnean Mercabilbaorentzat hain berezia den urtea amaitzear dagoela, abenduan merkaturatzeko aurreikuspenak goraka doaz, 21.900 tona inguruko salmentarekin, hau da, urteko salmentaren %10 baino gehiago. Urtetik urtera kopuruak gero handiagoak dira, Gabonen bezperan itsasoko eta lurreko produktuen salerosketak erritmo bizia sortzen duelako pabiloietan.

Gaur goizean, Mercabilbaoko egunik oparoenetako batean, Xabier Ochandiano Bilboko Udaleko Garapen, Merkataritza eta Enplegu zinegotziak instalazioak bisitatu ditu, Aitor Argote Ibáñez Mercabilbaoko zuzendari nagusiarekin batera, handizkako eta txikizkako enpresek produktuak saltokietara garaiz eta puntu freskoenean iritsi daitezen eguneko lehen orduetan egiten duten lana zuzenean ezagutzeko.

Elikagaien Unitatean lan egiten duten handizkako enpresek erritmo onean eta pandemia hasi zenetik ezarritako osasun-neurri guztiak betez mantentzen dituzte salmentak. Ildo horretan, sektoreka, arrainen eta itsaskien sektorean 2.300 tona inguru merkaturatzea espero da, hau da, urteko merkaturatzearen %14 inguru. Garai honetan gehien eskatzen diren produktu ohikoenak hauek dira: itsaskia eta arrain fina, legatza, bisigua edo lupia.

Fruta eta barazkien merkatuaren kasuan, 2021eko azken hilabeteari begira, 19.600 tona merkaturatuko direla aurreikusten da, hau da, urteko salmenten %8 inguru. Gehien eskatzen diren produktuak urte osoan ohikoak direnak dira, hala nola banana, fruta tropikala, anana, papaia, mahatsa, sagarra edo laranja, eta Gabonei zaporea ematen dietenak, mahaspasak, mertxikak, piku lehorra edo intxaurrak.

Abenduan, Mercabilbaon lan egiten duten enpresek “urteko fakturazio osoaren % 16 inguru dute jokoan, are gehiago Gabonetako egun aipagarrienak hurbildu ahala”, adierazi du hornidura zentroko zuzendari nagusiak.

Merkaturatze osoa azaroaren 30era arte

2021eko azaroaren 30eko merkaturatze-datuak 235.177 tonara iritsi dira guztira, 2020an epe berean baino zertxobait gehiago, batez ere fruta eta barazki gehiago saldu direlako.

Sektoreko aldi gogorrei dagokienez, lurreko produktuetan udaberria da nabarmenena, “hezurdun frutak” esaten zaizkienak kontsumitzen direlako. Itsasoko sektorean, berriz, apiriletik ekainera bitarteko hilabeteak nabarmentzen dira, antxoaren kosterarekin eta Gabon aurreko asteekin batera.

Aurten ere pandemia jasaten jarraitzen dugu, eta Basauriko instalazioetan lan egiten duten pertsona guztien osasunak lehentasuna izaten jarraitzen du.

Betiko zaporerik onena

Basauriko instalazioetan lan egiten duten pertsona guztien eguneroko lana eta urtetik urtera gainditzen diren merkaturatze-zifrak direla eta, Mercabilbao erreferentea da Penintsulako iparraldeko elikagaien horniduran. 13 hektareako gunea jarduera ekonomikorako, ehun bat enpresa, mila langile baino gehiago eta urtean 560.000 ibilgailu baino gehiagoko sarrerarekin, Elikagaien Unitatea Bilboko eta bere ingurune metropolitarreko motor ekonomikoa eta soziala da.

Prentsa oharra deskargatu

Nabarmendutako gaurkotasuna

Albistea

Mercabilbaok sarrera nagusiko langileen funtzionamendua eta segurtasuna hobetu ditu

Gehiago irakurri

Iragarki ofiziala

Akzio propioak amortizatzeagatik kapitala murrizteari buruzko iragarkia

Gehiago irakurri

Prentsa oharra

MERCABILBAO MERKATU JASANGARRIAGORAKO BIDEAN DOA, 2021EAN 257.100 TONA BAINO GEHIAGO MERKATURATUTA

Gehiago irakurri

Urteko txostena

2021 urteko txostena

Deskargatu

Sartu bideoen atalera

Ikusi bideoak

Argitalpena

2020 urteko txostena

Deskargatu

Norberaren cookieak, hirugarrenenak eta nabigazio-ohiturak aztertzekoak erabiltzen ditugu gure zerbitzuak hobetzeko informazioa biltzeko Nabigatzen jarraitzen baduzu, haien instalazioa onartzen duzu. Cookieak konfiguratu ditzakezu zure nabigatzailean, baina horrek nabigatzeko zailtasunak eragin ditzake webgunean.

Nola konfiguratu Onartu